englishflag

Tölvuorðasafn

Í Orðanefnd Ský 2016-2017 eru
Heiða Dögg Jónsdóttir
Birna Guðmundsdóttir
Jón Ragnar Höskuldsson
Sigurður Emil Pálsson
Þorvarður Kári Ólafsson

Hér er tengill í Facebook síðu nefndarinnar þar sem líflegar umræður fara fram

------------------------------------------------------------------------------------------------------------------------------

  Hér getur þú flett upp í Tölvuorðasafninu

 Yfirlit yfir rit orðanefndar Skýrslutæknifélags Íslands

Tölvuorðasafn í rafrænni útgáfu - fimmta útgáfa í maí 2013

Tölvuorðasafn orðanefndar Skýrslutæknifélags Íslands kemur nú út í fimmta sinn. Að þessu sinni er orðasafnið eingöngu gefið út á veraldarvefnum á vefsetrinu http://tos.sky.is/. Í fimmtu útgáfunni sem hér birtist hefur hugtökum fjölgað um 3,8% frá fjórðu útgáfu sem var gefin út sem prentuð bók árið 2005 og gerð leitarbær á sama vefsetri árið 2006. Fyrsta útgáfa Tölvuorðasafns kom út árið 1983 og hafði þá að geyma íslensk og ensk heiti á rösklega 700 hugtökum um tölvu- og upplýsingatækni. Frá og með annarri útgáfu frá 1986 hafa skilgreiningar og skýringar fylgt hugtökum í bókinni og í 5. útgáfu eru íslensk og ensk heiti ásamt skilgreiningum og öðru skýringarefni á rösklega 6800 hugtökum.

Frá árinu 1978 hafa eftirtalin átt sæti í orðanefndinni: Baldur Jónsson (d. 2009), Sigrún Helgadóttir (formaður), Þorsteinn Sæmundsson og Örn Kaldalóns. Stefán Briem hefur starfað mikið með nefndinni, var ritstjóri 3. og 4. útgáfu og ritsins Íslensk táknaheiti.

Viðar Másson, starfsmaður fyrirtækisins Datamarket ehf., hefur komið efni 5. útgáfu þannig fyrir á vefsetrinu að það er leitarbært. Fimmta útgáfan verður ekki gefin út sem prentuð bók. Prenthæft skjal með útliti fyrri útgáfu er þó aðgengilegt á vefsetrinu. Þar eru einnig upplýsingar um allar útgáfur Tölvuorðasafnsins og prenthæft skjal ritsins Íslensk táknaheiti. Einnig er veittur aðgangur að efni Tölvuorðasafnsins í sérstöku sniði (TBX) sem hentar fyrir þýðingaminni. Stefán Briem sá um alla tölvuvinnslu í sambandi við útgáfuna, þar með talið umbrot á prenthæfu skjali. Já ehf. hýsir vef Tölvuorðasafns.

Með þessari útgáfu lýkur þessi orðanefnd störfum. Nefndin hefur fært Skýrslutæknifélaginu vefsetrið til varðveislu. Það er von okkar að það efni sem þar er varðveitt verði tölvunotendum að gagni.

Áhugaverð samantekt Rásar 1 um Tölvuorðasafnið

-------------------------------------------------------------------------------------------------------------------------------------------- 

2005: Orðanefnd hefur nú gefið út Tölvuorðasafn í fjórða sinn.  

Í nýrri útgáfu Tölvuorðasafns eru um 7700 íslensk heiti og um 8500 ensk heiti á rúmlega 6500 hugtökum sem lúta að upplýsingatækni og tölvunotkun. Orðasafnið kom nú út í fjórða sinn 24. ágúst 2005 og eru hugtök um 30% fleiri en í síðustu útgáfu, enda er safnið nú 555 blaðsíður að stærð. Hugtökin í Tölvuorðasafni hafa flest verið sótt í alþjóðlega staðla. Líklega eru Íslendingar einna lengst á veg komnir með íslenskun tölvumáls ef litið er til hinna Norðurlandanna.

Tölvuorðasafnið er í tveimur hlutum. Fyrri hlutinn er íslensk-ensk orðaskrá og er þar að finna skilgreiningar og útskýringar á flestum hugtökunum. Síðari hlutinn er ensk-íslensk orðaskrá. Þar er íslensk þýðing við hvert orð og er hún hugsuð sem tilvísun til íslensk-enska hlutans.

Auk fullgildra heita eru fjölmargar skammstafanir í Tölvuorðasafni. Oftast er einnig sýnt hvernig lesið er úr þeim.

Tölvuorðasafn er afrakstur af áratuga starfi orðanefndar Skýrslutæknifélags Íslands. Orðanefndarmenn eru brautryðjendur tölvutækninnar á Íslandi og hafa fjölbreytilega reynslu af tölvunotkun allt frá upphafsárum tölvuvinnslu á Íslandi. Auk þess hafa þeir fengið til samvinnu við sig fjölmarga sérfræðinga í fremstu röð. Orðanefndina skipa Baldur Jónsson, Sigrún Helgadóttir Þorsteinn Sæmundsson og Örn S. Kaldalóns. Stefán Briem annast ritstjórn.
 

Tölvuorðasafn er höfuðrit á sínu sviði og gagnlegt öllum sem nota tölvur og fást við upplýsingatækni, allt frá byrjendum til sérfræðinga. Þetta orðasafn er ómissandi þeim sem vilja tala og skrifa á íslensku um upplýsinga- og tölvutækni á vönduðu máli.

Útgefandi Tölvuorðasafns árið 2005 er Hið íslenska bókmenntafélag í samvinnu við orðanefnd Skýrslutæknifélags Íslands. Bókina er unnt að nálgast hjá helstu bókaverslunum og hjá útgefanda, en þar má panta hana með 10% forlagsafslætti í hib@islandia.is Sjá einnig www.hib.is