Þessi síða notar kökur (e. cookies) til að auðvelda þér að vafra um vefinn.

Hausmynd1

Ragnheiður H. Magnúsdóttir hlýtur UT-verðlaun Ský 2019

Ragnheiður H. Magnúsdóttir hlaut í dag UT-verðlaun Ský 2019 en þau voru afhent við hátíðlega athöfn í Hörpu í dag. Það var Guðni Th. Jóhannesson, forseti Íslands, sem veitti verðlaunin í ár.

UTmessan 19 02 08 7612

Ragnheiður var framkvæmdastjóri Hugsmiðjunnar í tæp 6 ár, sinnti breytingarstjórnunarverkefni hjá Marel og er í dag forstöðumaður Framkvæmda hjá Veitum. Ragnheiður hefur setið í stjórn Samtaka vefiðnaðarins, stjórn Ský, verið formaður tækninefndar Vísinda- og tækniráðs, formaður Samtaka upplýsingatæknifyrirtækja hjá SUT og hefur svo sannarlega verið fyrirmynd fyrir konur í tækni. Segir valnefnd í rökstuðningi sínum að Ragnheiður hafi, að öðrum ólöstuðum, verið í fararbroddi þegar komi að því að halda mikilvægi upplýsingatæknigeirans á lofti og mikilvægi fjölbreytileika í þeim geira. 

Í rökstuðningi sínum sagði valnefnd ennfremur:

„Ragnheiður er sterkur leiðtogi og hefur gefið rausnarlega af sér í þennan mikilvæga málaflokk, í gegnum störf sín í tæknigeiranum, ráð, nefndir, stjórn og félagsstarf. Þá hefur hún verið óþreytandi við að breiða út boðskapinn í frítíma sínum, enda með skýra hugsjón og sterka sannfæringu þegar kemur að vægi upplýsingatækni í íslensku samfélagi.“

Á UTmessunni í dag voru UT-verðlaunin veitt í 10. sinn. Jafnframt veitti forseti Íslands þrenn önnur verðlaun við þetta tækifæri;  UT-stafræna þjónustan, UT-sprotinn og UT-fyrirtæki ársins.

UT-fyrirtæki ársins er Nox Medical fyrir sérstaklega gott starf á árinu 2018, en það hefur skapað sér sérstöðu á sviði svefnrannsókna í heiminum og unnið til fjölda verðlauna fyrir rannsóknir sínar og verkefni. Fá íslensk tæknifyrirtæki hafa raunar fengið jafn mikla umfjöllun á þessu sviði.

Leggja.is hlaut verðlaunin fyrir stafræna þjónustu en þjónusta þeirra þótti skara fram úr þegar kemur að því að einfalda daglegt líf fólks, enda gerir app þeirra fólki kleift að borga fyrir gjaldskyld bílastæði, sem veitir óumdeilanleg þægindi.

UT-sprotann hlýtur Syndis, en fyrirtækið hefur verið áberandi á sviði öryggismála og fundið stóra galla í vörum og þjónustu stórra og þekktra fyrirtækja, nú síðast snjallúrum barna. Öryggislausnin Adversary, sem Syndis þróaði og tekur á hættum og ógnum vegna netárása, hefur jafnframt vakið mikla athygli á alþjóðavísu.