Kveðja frá Öldungadeild Skýrslutæknifélags Íslands

 

Sveinbjörn helgaði Landsbankanum starfskrafta sína. Síðasta verk hans, unnið eftir að hann lét af störfum sem útibússtjóri og allt þar til yfir lauk var að hirða um mikið safn bankans af vélbúnaði sem notaður hefur verið við rekstur hans á þeim liðlega 120 árum sem saga hans nær yfir. Þar á meðal eru auðvitað tölvur því að bankinn tók snemma upplýsingatækni í sína þjónustu. Margt af þessum búnaði var til sýnis á afmælissýningu bankans í Morgunblaðshúsinu á afmælisárinu. Ásamt öðrum miðlaði Sveinbjörn sýningargestum af fróðleik sínum, en hann varð við annan mann fyrsti starfsmaður tölvudeildar bankans, líklega árið 1966. Eftir að sýningunni lauk var safnið allt skráð, merkt og pakkað á vörubretti sem komið var í geymslu. Sveinbjörn sá um þetta verk en skrifaði auk þess greinargerðir um ýmsa þætti tölvuvæðingar í bankanum.

Öldungadeild Skýrslutæknifélags Íslands hefur það að markmiði að stuðla að varðveislu minja um sögu upplýsingatækninnar á Íslandi. Nærri má því geta að þetta verk og sú alúð og nákvæmni sem Sveinbjörn beitti við það var okkur að skapi, enda sá hann til þess að félagið gæti fylgst með verkum hans og hafði milligöngu um að félaginu yrðu afhentar skrár og myndir ásamt nokkrum minjum úr skjalasafni bankans. Fyrir þetta er félagið afar þakklátt bæði honum og bankanum. Vonandi fáum við í safn okkar þau ritverk Sveinbjörns sem enn bíða heimildar bankans til afhendingar. Vonandi bera eigendur Landsbankans í nútíð og framtíð gæfu til að meta að verðleikum menningargildi vélasafnsins og búa því stað til frambúðar.

Sigríði Magnúsdóttur eiginkonu Sveinbjörns er vottuð innileg samúð, svo og afkomendum og öðrum ástvinum. Blessuð veri minning Sveinbjarnar Guðbjarnasonar. 

Jóhann Gunnarsson

formaður öldungadeildar Skýrslutæknifélags Íslands.