Það styttist í hina árlegu UTmessu og hefur áhugi á viðburðinum sjaldan verið meiri. Dagskrá ráðstefnunnar verður hún birt á morgun, 1. desember 2023. Opið er fyrir skráningu á ráðstefnuna og hægt að tryggja sér miða og vera meðal þeirra 1.200 ráðstefnugesta sem mæta. Öll helstu tölvu- og tæknifyrirtæki landsins ásamt erlendum aðilum taka þátt í UTmessunni og sjá til þess að gestir fái að sjá og upplifa það sem hæst ber í tæknigeiranum hverju sinni.

Markmið UTmessunnar er að sýna hve stór og fjölbreyttur tölvugeirinn á Íslandi er og reyna að fjölga þeim sem velja sér tölvu- og tæknigreinar sem framtíðarstarfsvettvang. UTmessan skiptist í ráðstefnudag og tæknidag ásamt viðburðum tengdum UTmessunni dagana þar í kring.

Föstudagur 2. febrúar: Ráðstefnudagur – fyrir fagólk í upplýsingatæknigeiranum
UTmessan er ein stærsta tölvuráðstefna sem haldin er á Íslandi með 10 þemalínur. Yfir 50 innlendir og erlendir fyrirlesarar stíga á svið og segja frá áhugaverðum viðfangsefnum og nýjungum. Fyrirlestrarnir eru ávalt mjög fjölbreyttir og gefa innsýn inn í framtíðina. Hefð hefur verið fyrir því að hæstráðendur stóru samstarfsaðila UTmessunnar séu fundarstjórar á ráðstefnulínunum og taka þeir alltaf jafn vel í að vera með. Auk ráðstefnunnar er sýning yfir 60 fyrirtækja á sýningarsvæðinu sem er opin fyrir ráðstefnugesti.

Uppselt hefur verið á ráðstefnu UTmessunnar síðustu árin og færri komist að en vilja. Heildardagskrá ráðstefnunnar er að finna á www.utmessan.is

Laugardagur 3. febrúar: Tæknidagur - fyrir almenning
Tæknidagurinn er fyrir alla fjölskylduna og aðra sem vilja sjá hvað er að gerast í tölvugeiranum og upplifa nýjustu tækni. Sýning tölvu- og tæknifyrirtækja er opin allan daginn og kostar ekkert inn. Alls kyns getraunir og leikir í gangi og margt fleira skemmtilegt í boði til að svipta af hulunni af dulúð tölvuheimsins, bæði fyrir börn og fullorðna. Hönnunarkeppni véla- og iðnverkfræðinema HÍ er hluti af tæknidegi UTmessunnar ásamt mörgum skemmtilegum atriðum.

Gífurlegur fjöldi hefur lagt leið sína á tæknidag UTmessunnar í gegn um árin og hvetjum við alla til að mæta með fjölskylduna og eiga skemmtilegan tæknidag í Hörpu. Nánari upplýsingar um hvað verður í boði á tæknideginum verður að finna á www.utmessan.is þegar nær dregur.

Allt um UTmessuna er að finna á www.utmessan.is