Toshiba hefur sett á markað nýjan háskerpuspilara fyrir HD-DVD diska sína og kostar hann innan við USD 500. Hann er sá fyrsti á því verði sem ræður 1080p upplausn á mynd. Heildarsala á HD-DVD diskum er komin uppundir milljón eintök.
Allt stefnir í að Evrópuþingið samþykki lög til að keyra í gegn lækkun á farsímagjöldum milli landa í sambandinu. Lækkunin yrði í mörgum tilvikum veruleg og því er ekki að undra að farsímafyrirtæki kveinki sér undan því sem í vændum er.
Hið danska Computerworld birti grein um þær hugmyndir að koma upp netþjónabúum á Íslandi. Lagt er upp með að nýta jarðvarma til að framleiða rafmagn. Samkvæmt greininni eru fulltrúar Microsoft væntanlegir til landsins til að kanna betur aðstæður og möguleika.
Verulegt fall hefur orðið á magni þess ruslpósts sem á uppruna sinn í Kína og er líkum leitt að því að bæði hafi jarðskjálftar sem þar urðu fyrir jól truflað en einnig að stjórnvöld séu að loka ISP-um þaðan sem mesta ruslið kemur. Nokkur lönd eru á svörtum lista fyrir ruslsendingar en Pólverjar eru stórtækastir innan Evrópu.
Könnun í Bretlandi hefur leitt í ljós það sem raunar er á allra vitorði, að umtalsverðum tíma er varið í stefnulaust ráp fram og aftur um vefinn. Um fjórðungur aðspurðra reikna með að 30% tímans sem varið er á Netinu fari í þetta. Fyrirbærið hefur meira að segja alið af sér nýyrði, sögnina "wilf".