Búið er að gefa út uppfærslu á Firefox vafranum og hefur hann núna gerðina 1.5.0.7. Til þessa hefur Internet Explorer verið í uppáhaldi hjá tölvuþrjótum en með auknum vinsældum Firefox er landslagið að breytast og hann er í auknum mæli skotmark. Microsoft gaf líka út í síðustu viku fjöldamargar endurbætur á hugbúnaði sínum.
Þó það sé langt í frá útkljáð hvor gerðin af háskerpu DVD verður ofan á er ljóst að hvernig sem fer munu minnisframleiðendur njóta góðs af. Nýir DVD spilarar þurfa sextánfalt meira minni en eldri gerðir og því gæti Samsung sem dæmi aukið söluna margfalt. Á móti kemur að markaðurinn er í biðstöðu þar sem neytendur bíða eftir því hvor gerð DVD nær undirtökunum.
Zune spilastokkurinn býr yfir mörgum áhugaverðum eiginleikum, eins og stórum skjá fyrir bíómyndir og þráðlausri tækni til að skiptast á lögum. Engu að síður hefur Apple svo afgerandi forskot með iPod spilaranum að Microsoft þarf að vera ansi þrautseigt áður en fyrirtækið nær markaðshlutdeild af keppinautinum.
Yfirvöld í Kaliforníu hafa núna undir höndunum næg gögn til að leggja fram ákæru hendur tilteknum aðilum innan HP og gegn öðrum utan fyrirtækisins. Stjórnarformaður HP neyddist til að segja af sér eftir að upp komst að hún hafði ráðið verktaka til að leita að fjölmiðlaleka úr stjórn fyrirtækisins. Verktakinn náði gögnum af símafyrirtæki með því að villa á sér hemildir og fá þau afhent í nafni ýmissa stjórnarliða og fréttamanna.
Microsoft er búið að taka opinberlega í notkun Windows Live Search, sem er leitarvél sett til höfuðs Google og fleirum. Leitarvélin býður upp á ýmsa möguleika til að sérsníða og sérstaklega er hugað að myndaleit.