Upplýsingatækniverðlaun Ský
UT-verðlaunin eru heiðursverðlaun fyrir framúrskarandi framlag til upplýsingatækni á Íslandi.
Skýrslutæknifélag Íslands (Ský) veitir verðlaunin og eru þau að danskri fyrirmynd. Verðlaunin hafa verið veitt árlega frá árinu 2010.
Kallað er eftir tilnefningum og geta allir sent inn tillögur en hver aðili getur aðeins sent inn eina tilnefningu í hverjum flokki og skulu tilnefningar vera rökstuddar í texta (ekki setja tengla hingað og þangað).
Hægt er að tilnefna einstakling, fyrirtæki eða verkefni sem hefur skarað framúr á sviði upplýsingatækni, skapað verðmæti og auðgað líf Íslendinga með hagnýtingu á upplýsingatækni. Áhersla er lögð á að framlagið hafi þegar sannað sig með afgerandi hætti.
Til viðbótar við UT-verðlaunin eru veitt verðlaun í nokkrum flokkum fyrir afrek síðasta árs:
- UT-Sprotinn - flokkur fyrir fyrirtæki sem hafa verið starfandi síðastliðin 1-6 ár og eru að bjóða lausnir sem hafa vakið athygli.
- UT-Stafræna opinbera þjónustan - flokkur ætlaður lausnum á opinbera markaðnum sem skara fram úr og einfalda daglegt líf fólks. Vefsíður, öpp og rafrænar þjónustur hvers konar falla undir þennan flokk.
- UT-Stafræna almenna þjónustan - flokkur ætlaður lausnum á almenna markaðnum sem skara fram úr og einfalda daglegt líf fólks. Vefsíður, öpp og rafrænar þjónustur hvers konar falla undir þennan flokk.
- UT-Fyrirtækið í flokki stærri fyrirtækja > 50 starfsmenn - flokkur fyrir stór fyrirtæki sem nýta sér upplýsingatækni í sinni starfsemi og hafa náð góðum árangri með einum eða öðrum hætti á árinu á innlendum sem erlendum vettvangi með upplýsingatækni að leiðarljósi.
- UT-Fyrirtækið í flokki minni fyrirtækja < 50 starfsmenn - flokkur fyrir minni fyrirtæki sem nýta sér upplýsingatækni í sinni starfsemi og hafa náð góðum árangri með einum eða öðrum hætti á árinu á innlendum sem erlendum vettvangi með upplýsingatækni að leiðarljósi.
- UT-Fjölbreytileika fyrirmynd - flokkur til að vekja athygli á því sem vel er gert og styður fjölbreytileika og gott fordæmi.
Árlega skipar stjórn Ský valnefnd sem hefur sérþekkingu og reynslu á sviði upplýsingatækni. Valnefnd samanstendur af tveimur síðustu UT-verðlaunahöfum, fulltrúum háskóla, fulltrúa stjórnar Ský ásamt starfandi framkvæmdastjóra Ský. Valnefndin getur einnig sent inn tilnefningar.
Eftir að fresti til tilnefninga lýkur velur valnefnd þann aðila sem þykir skara framúr og skal hún vera einróma um valið og rökstyðja það vel.
Hægt er að senda inn tilnefningar hvenær sem er á netfangið sky@sky.is
