Nú erum við loksins farin að sjá tæki og netbúnað í sölu sem styðja sjöundu kynslóð þráðlausra neta, betur þekkt undir nafninu Wi-Fi 7. Þráðlaus net umbyltu því hvernig við tengdumst Netinu og breiddist tæknin út á ljóshraða til heimila og inn á vinnustaði landsins upp úr aldamótum. Talið er að um fjórir milljarðar tækja með Wi-Fi séu seld ár hvert og til eru 45,9 milljarðar tækja með Wi-Fi í heiminum í dag. Áætlað er að á þessu ári muni alls 231,4 milljónir tækja með Wi-Fi 7 vera framleidd^[1].

En hvað er Wi-Fi 7 og hvernig á að nýta sér það?

Hvað er Wi-Fi 7?
Wi-Fi 7 er byggt á IEEE 802.11be staðlinum, sem stendur fyrir Extremely High Throughput (EHT), sem mætti þýða sem ótrúlega mikil afköst (ÓMA). Fyrstu drög að staðlinum komu út í mars árið 2021 og var hann svo kláraður í janúar á þessu ári. Markmiðið með Wi-Fi 7 var að auka verulega afköst þráðlausra heimilis- og fyrirtækjaneta, bæta samhæfingu þráðlaust tengdra tækja, lækka svartíma, gæta persónuverndar og auka öryggi.

En hvernig nær Wi-Fi 7 þessum afköstum? Hér er það helsta sem opnar á nýjar hæðir:

• Fleiri rásir, eða allt að 320 megarið
• Bestun nýtingar samskipta með 4K QAM merkjamótun
• Fjöltengingar tækja (MLO) tengir tæki með meira en einu bandi
• Formótun svartíma svo hægt sé að lækka hann (e. deterministic latency)

Af hverju skiptir Wi-Fi 7 máli?
Wi-Fi 7 getur fræðilega náð allt að 46 gígabitum á sekúndu sem er umtalsvert stökk frá fræðilegum hraða Wi-Fi 6e uppá 9,6 gígabita á sekúndu. Við raunverulegar aðstæður mun fólk sjá um 19 gígabita á sekúndu hraða. Hér er um að ræða hraða vel umfram það sem við þekkjum almennt af gígabit Ethernet tengingum og fer létt með 10 gígabita ljósleiðaratengingar. Svartíminn hefur verið verulega bættur og opnar á nýja möguleika, m.a. fyrir netspilun, rafíþróttir, sýndarveruleika, gagnaukinn veruleika og fjarfundi. Wi-Fi 7 tryggir betri afköst á þéttum netum og í þéttbýlum borgum. Fjöltengingar gera þráðlausum tækjum kleift að tengjast um tvö bönd – sem eykur hraða, bætir stöðugleika og eykur drægni.

Hvernig er hægt að nýta sér Wi-Fi 7?
Áður en hægt er að nýta sér meiri hraða, lægri svartíma og aukinn stöðugleika þarf að uppfæra netbúnað og tæki. Það þarf nýjan vélbúnað til að nýta sér Wi-Fi 7, en því miður er ekki hægt að uppfæra eldri búnað með hugbúnaði til að virkja Wi-Fi 7.

Fyrst þarf að uppfæra netbeini og fyrst um sinn verður það kostnaðarsamt. TP-Link Deco BE85 styður Wi-Fi 7 með allt að 19 gígabita á sekúndu hraða og fæst hér á landi. Sumir ódýrari netbeinar gætu stutt Wi-Fi 7 en styðja ekki fullan hraða vegna takmarkanna í vélbúnaði.

TP-Link Deco BE85 nær allt að 19 gígabitum á sekúndu hraða þráðlaust.

Svo þarf að uppfæra tæki sín en fyrstu tækin með Wi-Fi 7 eru að koma á markað og má þá nefna eftirfarandi tæki:

• Apple iPhone 16 línan
• Asus ROG Phone 7
• Samsung Galaxy S24 Ultra
• Google Pixel 8 og 9 línurnar
• Lenovo Yoga Slim 7, Thinkpad T14s og Thinkpad P1 frá 2024

iPhone 16 styður Wi-Fi 7

Framtíðin er því björt fyrir þráðlaust net og á næstunni munum við sjá fjöldann allan af nýjum tækjum og netbúnaði sem styður Wi-Fi 7. Hægt og rólega munu verðin lækka og fleiri komast á mun meiri hraða.

Höfundur: Héðinn Þorsteinsson, vörustjóri ljósleiðara hjá Mílu

Heimildir:

^[1] https://www.wi-fi.org/beacon/the-beacon/the-state-of-connectivity-wi-fi-momentum-in-2024#:~:text=Wi%2DFi®%20is%20celebrating,shipments%20over%20the%20technology's%20lifetime.